കുട്ടികളോടു് സത്യം പറയരുതു്

കുട്ടികളോടു് സത്യം പറയരുതു്;
അവര്‍ക്കുവേണ്ടി ചിന്തിക്കാന്‍ നാമുള്ളപ്പോള്‍
അവരെ വെറുതെ വിഷമിപ്പിക്കരുതു്;
കലണ്ടര്‍ താളുകളില്‍ നിന്നു് ചരിത്രത്തെ,
പുസ്തകക്കെട്ടുകളുടെ ചതുരക്കൂമ്പാരങ്ങളില്‍ നിന്നു് ശാസ്ത്രത്തെ,
ഡിപ്പാര്‍ട്ട്മെന്റെ സ്റ്റോറുകളിലെ പ്ലാസ്റ്റിക്‍ റാപ്പറില്‍ നിന്നു്
അരിമണികളെ
ഒരുകാലത്തും മോചിപ്പിക്കരുതു്.
ഒക്‍ടോബര്‍ 2 : ഗാന്ധിജയന്തി
നവംബര്‍ 14 : ശിശുദിനം
ഗായ് ഏക് പാല്‍തൂ ജാന്‍വര്‍ ഹെ
എന്നിങ്ങനെ ചൊല്ലിപ്പഠിച്ചും തല്ലിപ്പഠിച്ചും
അവര്‍ വളരട്ടെ!

കുട്ടികളോടു് സത്യം പറയരുതു്;
ഞായറാഴ്ചകളില്‍ പീടികത്തിണ്ണയില്‍ കുത്തിയിരുന്നു്
ഒതുക്കത്തില്‍ കടലകൊറിച്ചതിനു്
സ്വാതന്ത്ര്യസമര പെന്‍ഷന്‍ ലഭിച്ചതും
ഉപ്പുസത്യാഗ്രഹകാലത്തു്
കാട്ടില്‍ പുല്ലരിയാന്‍ പോയതുവഴി
കാക്കിനിക്കര്‍ കരമൊഴിവായി കിട്ടിയതും
ഒരു ഗാന്ധിത്തൊപ്പികൊണ്ടു്
ചൌരിചൌരയ്ക്ക് പട്ടടയൊരുക്കിയതും
നാമവരോടു് പറയേണ്ട.
പൂണൂലിട്ടോ തൊപ്പിയണിഞ്ഞോ അല്ല
അപകടം വരുന്നതെന്നു്
അവരറിയരുത്.
വിതകൊയ്യാനും വഴിനടക്കാനും
മാറുമറയ്ക്കാനും തൊഴിലെടുക്കാനും
ഇന്നാട്ടില്‍ സമരങ്ങളുണ്ടായിരുന്നെന്നു്
അവര്‍ മനസ്സിലാക്കരുത്.
വര്‍ഷങ്ങള്‍ക്കു് മുമ്പവസാനിച്ച
ക്വിറ്റ് ഇന്ത്യാ പ്രക്ഷോഭം മൂലമാണു്
ഇന്ത്യക്കു് സ്വാതന്ത്ര്യം കിട്ടിയതെന്നു്
അവര്‍ തിരിച്ചറിയട്ടെ.
ക്വിറ്റ് ഇന്ത്യ സമരത്തില്‍ മാത്രം
ഹിംസയെ അഹിംസയായി പ്രഖ്യാപിച്ചതും
ഇംഗ്ലണ്ടിനു് കടം കയറിയതും
ലേബര്‍ പാര്‍ട്ടി അധികാരത്തില്‍ വന്നതും
അറിയുകയേവേണ്ട.

കുട്ടികളോടു് സത്യം പറയരുതു്;
ഒറ്റഖണ്ഡികയിലൊതുക്കിയിരുന്ന
താന്തിയ തോപ്പിയേയും
ഒറ്റമൌനത്തില്‍ വിസ്മരിച്ചിരുന്ന
അസംഖ്യം സമരങ്ങളേയും
ഓര്‍മ്മയിലേക്കു് വലിച്ചിഴയ്ക്കരുതു്.
ദൈവം കറുത്തിട്ടോ വെളുത്തിട്ടോ എന്നും
വിശപ്പു് കാപ്പ ധരിച്ചോ ഇടത്തോട്ടു് മുണ്ടുടുത്തോ എന്നും
അവരോടു് തിരക്കരുതു്.
ക്ഷേത്രമുറ്റത്തു്
മണിയടിച്ചവരും പുറത്തടിച്ചവരും ആരൊക്കെയെന്നു്
ഒരുനാളും അവര്‍ അറിയരുതു്.
ലാഹോര്‍, മീറത്തു്, ലക്‍നൌ, കാണ്‍പൂര്‍ എന്നീ പേരുകളെ
ബിര്‍ള മന്ദിര്‍, ബിര്‍ള മന്ദിര്‍, ബിര്‍ള മന്ദിര്‍
എന്നീ പെരുമകള്‍ കൊണ്ടു്
റാഷ് ബിഹാരി, സുഭാഷ് ചന്ദ്ര, ഭഗത് സിംഗ്, ആസാദ്
എന്നീ പേരുകളെ
തിലക്‍, പട്ടാഭി, തുടങ്ങിയ ഗാന്ധിഗിരികളാല്‍
ഓട്ടയടച്ചു് മുന്നേറുക.

കുട്ടികളോടു് സത്യം പറയരുതു്;
അവരെ ചോദിക്കാന്‍ പ്രേരിപ്പിക്കരുതു്.

please refer: news story